சீனாவின் யுன்னான் மாகாணத்தின் குன்மிங் நகரில் நடைபெற்ற 7வது சீனா–தெற்காசிய ஒத்துழைப்பு மன்றத்தில் இலங்கையை பிரதிநிதித்துவப்படுத்தி பிரதி அமைச்சர் அருண் ஹேமச்சந்திரா கலந்து கொண்டார். ‘அண்டை நாடுகளுடன் இணைந்த எதிர்காலத்திற்கான ஒத்துழைப்பு கூட்டாண்மையை வலுப்படுத்துதல்’ என்ற கருப்பொருளின் கீழ் இந்த மன்றம் நடைபெற்றது. பிரதி அமைச்சர் அருண் ஹேமச்சந்திரா மன்றத்தில் உரையாற்றியதுடன், பிராந்திய ஒத்துழைப்பு, பரஸ்பர மரியாதை, அமைதியான இணை வாழ்வு, கூட்டு வளர்ச்சி ஆகியவற்றிற்கான இலங்கையின் தொடர்ச்சியான அர்ப்பணிப்பை மீண்டும் உறுதிப்படுத்தினார்.
பிராந்தியம் முழுவதும் நிலையான வளர்ச்சி, ஸ்திரத்தன்மை, செழிப்பை மேம்படுத்த அண்டை நாடுகளுக்கிடையிலான கூட்டாண்மைகளை மேலும் வலுப்படுத்துவதன் முக்கியத்துவத்தை பிரதி அமைச்சர் வலியுறுத்தினார். பல நூற்றாண்டுகளாக நிலவி வரும் கலாசார பரிமாற்றங்கள், வர்த்தக உறவுகள், மற்றும் மக்களுக்கிடையிலான தொடர்புகளை அடிப்படையாகக் கொண்டு கட்டியெழுப்பப்பட்ட இலங்கை–சீனா உறவு காலத்தால் சோதிக்கப்பட்ட நீண்டகால நட்புறவாகும் என அவர் குறிப்பிட்டார்.
இலங்கையினுள் நிலையான, வெளிப்படையான முதலீட்டாளர் நட்பு மற்றும் உலகத்துடன் தீவிரமாக இணைந்த பொருளாதாரத்தை உருவாக்குவதற்காக இலங்கை அரசு முன்னெடுத்து வரும் முயற்சிகளை பிரதி அமைச்சர் விளக்கினார். நிலையான பொருளாதார வளர்ச்சிக்காக வர்த்தகம், முதலீடு, சுற்றுலா, டிஜிட்டல் மாற்றம், புதுப்பிக்கத்தக்க ஆற்றல், விவசாயம், கல்வி, திறன் மேம்பாடு மற்றும் பொருளாதார வளர்ச்சியை ஊக்குவிப்பதில் அரசு அதிக கவனம் செலுத்தி வருவதாகவும் அவர் வலியுறுத்தினார்.
